إستعراض|مشترياتي من أمازون 📲🔖

التدوينة التي سنستعرضها في”تحت المجهر” بعنوان: ‘ مشترياتي من أمازون ‘

للمدونة onlydalya@

وننتظر تعليقاتكم وآرائكم وتقييمكم لها في التعليقات.


My Amazon Purchases| مشترياتي من أمازون

مرحبا يا حلوين !!

شخباركم.. إن شاء الله طيبين وبسعادة دائمة يا رب

موضوع اليوم جميل وخفيف وأتوقع أن الكل أصبح يحبه ويعشقه ..

وقبل لا نبدأ خلينا نجهز قهوتنا عشان نستمتع بالقراءة

في السنوات الأخيرة أصبح الناس أكثر جرأة بالنسبة للتسوق الإلكتروني خصوصًا أن الأسعار خرافية مقارنة بالسوق المحلي عندنا، عن نفسي أقدر أقول وبكل ثقة أني من الأشخاص المدمنين بالنسبة للتسوق الإلكتروني .. ومن سينين طويلة قبل ما تنتشر هذه الظاهرة..

كيفني بس وأنا أتفلسف .. 😉

بصراحة أكثر جزئية أحبها لم توصلني شحنتي وافتحها مثل الطفل اللي يفتح هديته ويلقى اللعبة اللي كان يحلم فيها .. أي هذا أدق وصف لحالتي .. يعني استحالة اتشافى من هذه العلة 🙃

محمد زوجي يأس وأعلن استسلامه عن محاولة اقناعي للعدول عن هذه العادة المدمرة للجيب ولكنها جدًا جميلة للنفسية ..😅

يعني بدل ما أروح جلسة علاج عند دكتور نفسيه بسبب اكتئابي أو أني اروح صالون اصرف الميات وأحيان الالاف عشان بس أشعر بشوية صنفرة اقدر أسويها في البيت .. خلني أصرفها على مشتريات دائمة عندي وتسعدني ..🤣😉

وأنا أكتب هالتدوينة شريت لي كم غرض من أمازون ..

المشكلة أن توي شارية منهم وموضوع هذه التدوينه مشترياتي من أمازون ..

شكلي بخليه سيريز موضوع متجدد ..

المهم نجي للزبدة والمهم .. لي فترة قاعدة اتقضى عشان اجهز مكتبي والكوفي كورنر الخاص فيني وناوية انقلهم لغرفة ثانية .. ومن الأشياء المهمة والجميلة في الكوفي كورنور هي الكتب اللي تحطيها في طاولة القهوة غالبًا ما يكون شكلها جميل وتتحدث عن الفن والديكور والجمال بصفة عامة .. كل شخص يحط الأشياء اللي تستهويه..

عن نفسي هالفترة طايحة بالفاشن وكذا براندز حابتهم حيل وكذا مدري كيف كذا حبيت ادخل بتفاصيل تاريخهم وكيف بدأوا وكيف أصبحوا ومن هالسوالف .. ونكون صريحين شكل اصدارات كتبهم تعطي شكل للمكان وفخامة وهم يعتبروا اساس الفاشن .. وبعدها قلت بحط أشياء عامة بخصوص البيوتي من ميك أب وعناية بالبشرة..

لذلك قررت أني أغير الكتب اللي كنت حاطتهم بطاولة القهوة وأخليهم فاشن وكذا ..ما ننكر أن شكل كتب الفاشن كثير جذاب وجميل، لذلك بدأت رحلة البحث عن الكتب في بعض المكتبات اللي بجدة والحق مو من قلب بحثت بس كنت اتصفح بعيوني اذا في كتب شكلها جيد مثل كتب دار شانيل وديور وهالبراندز .. المهم ما لقيت اللي نفسي فيه ..

المفروض أروح فيرجن وبصراحة ما مداني لكن اللي كنت متخوفة منه أن ممكن بعد ما اشتري الكتاب ألقاهم مشخطين على بعض الصور أو انهم مغطيين أو حاذفين فملعيش بكون دافعة مبلغ وقدرة على الكتاب أقل شي تكون الصور كاملة وكذا فقررت أني أشتريها من أمازون.

لذلك مالي غير حبيب القلب موقع أمازون خصوصا أني طالبة مجموعة أكياس خاصة للبزنس توصل على بريدي الأمريكي قلت يالله خليني اقضي كم كتاب من أمازون ويوصلو كلهم سوا .. خصوصا أن اسعار الكتب مثل اللي أبيها تجيك غالية عندنا وممكن يكونوا مشخطين على بعض الصور مافيني أشوف صور جميلة مشوهه .. لذلك شمرت عن ساعداي وبديت مرحلة البحث عن الكتب اللي ببالي في أمازون..

أول كتاب جا ببالي اشتريه هو حق شانيل بعد فحص وتمحيص أخيرًا لقيت الكتاب اللي ابيه وقعدت اشوف آراء المشتريين السابقين وتصويرهم للكتاب وآرائهم اذا يسوى ولا لاء ..

ليه كتاب شانيل؟!

أحب ستايل ملابسهم تبهرني كلاسك و أنيقة وبسيطة بنفس الوقت٫ لذلك قررت اشوف الكتب التابعة لهذه الدار الراقية والجميلة .. أكثر شي كنت خايفة منه جودة الصور والورق تكون رديئة لذلك كنت كل ما اختار كتاب اشوف الفيدباك عنه وتصوير الزباين له لين ما وقع على عيني هذا الكتاب الجميل والكبير والمثير في نفس الوقت .. وحطيته بسلة المشتريات ..

الحمدلله وصل وكان مثل ما تمنيت وأكثر بعد .. الصور جودتها جدا رائعة وكله صور وقليل فيه الكلام بحيث يوم اشرب قهوتي اقعد اتفصح فيه واتفرج .. وبصراحة شكله تحفة فنية .. وفيه صور من بدايات دار شانيل إلى سنة ٢٠١٥ خاص بعروض الـ Cat walk ..

رابط كتاب شانيل

الكتاب جاني مغلف تغليف شفاف عشان يحميه من عوامل التعرية اللي ممكن يمر فيها .. وبجد وصلني مافيه أي مشاكل والغلاف هو عبارة عن قماش يعني ممكن يمسك فيه أي شي لذلك كثير مبسوطة لانهم مغلفينه ..وجودة الورق جدا جميلة وتعتبر هاي كوالتي ..

الحين خلصنا من الكتاب مع أنه ببالي أخذ كتاب ثاني وهو حق دار ديور بس قلت خلني اجرب كتاب واحد وأتاكد من جودته وبعدها اكمل مشترياتي للكتب ..

لذلك شريت بس كتاب واحد .. لين أتأكد من جودة الكتاب الثاني وابحث بقلب عشان لا اتخم .. ما فيني اتنصب أو يطلع الكتاب بجودة سيئة بقعد أندب على حظي كثير..

نجي للشي الثاني اللي تعبت ادور فيه المكتبات وهو قلم تعبئة حق كارتيه شريت قلم من سنين من باريس جاليري والحين خلص الحبر ومهما اشتري من قلم تعبئة ما يطلع مناسب للقلم قلت مالي غير أني اشتريه من نفس الماركة .. فقررت ادور في المكتاب بس مافي .. لذلك توجهت لأمازون حبيب قلبي وسويت سيرش ولقيت عندهم نفس قلم التعبئة اللي كان موجود بقلمي من الفرحة خذيت لي اثنين عشان يكفوني فترة طويلة .

رابط أقلام التعبئة لكارتيه

المهم ما تتصوروا شكثر فرحتي يوم لقيت اكثر اثنين تعبت وأنا ادورهم .. ومن زود فرحتي شريت اثنين من اقلام التعبئة بس الصدمة أنه ما طلع نفس مقاس القلم ..

لو تشوفوا شلون مركبة قلم التعبئة كارتيه بتسحبه مني، المهم أني اكتب فيه و مرررة أحب اكتب فيه بالأجندة وهم بعد جدا متناسق مع أجندتي الجميلة ..

طبعًا حطيت حلطمتي بالانستغرام وجاتني ردود جميلة فادتني أن الأفضل أروح لكارتيه وهم أكيد يوفرون اقلام التعبئة الخاصة بأقلامهم المشكلة مدري ليه ما جاني هالخيار🤣🧐🤨 أو حتى أني اروح لباريس جاليري ليه كنت اروح للمكتبات الله أعلم ..

المهم وبما أن طلبيتي الثانية وصلت و أنا لسه ما بعد نزلت البوست الأول رح أضيفهم كلهم هنا لأن بصراحة

كل مشترياتي مو كثير هذه المرة ..

مجموع مشترياتي كلها كتابين فاشن وقلمين كارتيه والجغ الخاص بالحليب حق ألة القهوة ..

بالنسبة لأغراض الشغل فمارح اعرضها لأنها تخص الشغل .. ومو مهمة بنظري إلا إذا سويت موضوع خاص بالنسبة للشغل الخاص شلون توفرون أشياء أساسية بأسعار معقولة وبجودة عالية ..

فإذا مهتمين لهالنوع من البوستات اكتبوا في الكومنت عشان اجهز بوست منفرد خاص بالأعمال الخاصة من تكاليف ومواقع مساعدة ممكن ترفع من مستوى البراند الخاص فيك..

المهم نرجع ثاني لمحور حديثنا ..

بعد ما فتحت القلم .. شايفين شلون ملصقة قلم التعبئة عشان يمسك نفسه 😅😂

لحظة الحقيقة ..

قلم التعبئة طلع قصير وما ينفع .. 🙃🤨😕

المهم لملمت اغراضي مرة ثانية وقررت احدد يوم ثاني واروح كارتيه واقولهم ابي قلم تعبئة لهذا القلم وافتك ..

** ** **

المهم الحين نجي للطلبية الثانية اللي وصلت ..

وهالمرة تحتوي على كتاب لدار ديور وجغ شريته حق آلة القهوة

وبصراحة كنت متحمسة كثير على كتاب ديور توقعاتي وصلت السما من بعد كتاب شانيل ..

وبدون صبر فتحت البوكسات حتى أوصل لكتاب ديور

رابط كتاب ديور

مثل ما أنتوا شايفين غلاف الكتاب من القماش وللأسف ما جاني مثل شانيل مغلف بنايلون جاني كذا مفتوح أشوى أني ما طلبت معه شي ممكن يخرب القماش ..

ومو بس كذا لقيت أن فيه آثار تراب وشوية أوساخ على القماش بس مو مرة كثير يعني الحمدلله أنها جات على كذا ..

لو أتكلم عن شكل الغلاف لين بكرة ما رح اخلص .. شايفين شكثر رائع واللمعة خرافية جدا

اللون الرمادي خطير .. أبدا مو ندمانه أني شريته أبدًا أبدًا ..

الحمدلله جودة الكتاب جدًا جدًا عالية والصور واضحة وجودة الورق عالية ..

وهالشي مهم بالنسبة لي ..

مليان صور وفيه هم بعد تاريخ دار ديور .. حبيته كثير ..

المهم ارتحت نفسيا الحمدلله أن الكتابين مبسوطة فيهم وأبدا مو ندمانة أني شريتهم

وقاعدة أخطط لكتب ثانية بس بخليها شوي قدام ..

هنا بحط لكم صور الكتابين مع بعض ..

** ** **

نيجي لآخر شي شريته من أمازون وهو الجغ حق الحليب لآلة القهوة ..

بصراحة ما كنت ناوية اشتريه من أمازون بس يوم قعدت ادور في النت من المواقع اللي توصل دايركت للسعودية أو متاجر سعودية توصل

لقيت ماشاءالله على الأسعار جدا مبالغ فيها وهالشي يقهرني ..

وهذه أحد الأسباب اللي تخليني اشتري من أمازون أو حتى مواقع اجنبيه وقلت طالما أني طالبة من أمازون خلاص خليني اطلب الجغ بجودة ممتازة وسعر حلو ..

فريت موقع أمازون لين طحت بهذا الجميل

سعره جميل وجودة جدًا عالية والحجم اللي أبيه لأني ما أحب اكثر حليب كثير فحبيت حجمه الصغير ..

رابط الجغ

اسم هذا الجغ : Star Coffee 12, 20 or 32oz Stainless Steel Milk Frothing Pitcher

والأجمل أن فيه قياس بداخل المق وجودة جدًا عالية وفعلا يستحق التقييم اللي معطينه هو أمازون ..

وبكذا وصلنا لختام البوست ..

أشوفكم قريبًا ..

ويسعدني تعليقكم .. هل تحبوا بوستات المشتريات وايش اكثر المواقع اللي تحبوا تشتروا منها ؟!

One Reply to “إستعراض|مشترياتي من أمازون 📲🔖”

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

شعار وردبرس.كوم

أنت تعلق بإستخدام حساب WordPress.com. تسجيل خروج   /  تغيير )

Google+ photo

أنت تعلق بإستخدام حساب Google+. تسجيل خروج   /  تغيير )

صورة تويتر

أنت تعلق بإستخدام حساب Twitter. تسجيل خروج   /  تغيير )

Facebook photo

أنت تعلق بإستخدام حساب Facebook. تسجيل خروج   /  تغيير )

Connecting to %s