إستعراض|كيف هو شعور أن تكون أم لبعض الوقت ؟ تجربة ضربت بخططي عرض الحائط . 👪⏳🍼

التدوينة التي سنستعرضها في “تحت المجهر بعنوان “كيف هو شعور أن تكون أم لبعض الوقت ؟ تجربة ضربت بخططي عرض الحائط”

للمدونة لافا ‎@Lafa0

وننتظر تعليقاتكم وآرائكم وتقييمكم لها في التعليقات.


لما ذكرت اختي انها راح تترك عندنا اطفالها كم يوم ماكان عندي مشكلة💁🏻.. وبعقلي اتذكر المرات اللي قضوها عندي وان الموضوع بسيط جدا💁🏻 .. لكن بعد هذي التجربة اضحك على افكاري بوقتها .. لان الواقع غير افكاري تماما😅.
هذي التجربة كسرت كل انواع الروتين والقواعد اللي عندي رغم ان عيال اختي مجرد طفلين🤦🏻‍♀️؛ الكبير عمره ثلاث سنوات والصغير سنة ونص، وكان معاهم المربية.
اول تحدي بالنسبة لي كان اني اخليهم يدخلون السرير بدري عشان يمدي نقرا قصة ونسولف شوي وبعدها ينامون. مثل هذا النظام صعب جدا على شخص مثلي يعاني من الارق بالاضافة لاوقات دوامي المتغيرة كل يوم. غير أن روتيني مافيه مكان لاي تشتيت او اشياء فجأة تصير الا من اندر النوادر. و جدولي ازحم من المزحوم مابين العمل والمتجر، لكن قررت انه مو مستحيل😇. بس هيهات .. التخطيط والواقع ماكان بينهم اي تشابهه للاسف😖.
الخطة كانت انومهم بدري وارجع مكتبي اخلص كذا شغله خلال ساعة وانام👌🏻. في الواقع بعد ما ينامون كنت ادخل سيده سريري لان ماعندي اي طاقة افكر فما بالكم اسوي اي شغل😵.
كمان حصل مشكلة بيوم كنت مداومه من الفجر وانا مانمت الا كم ساعة فرجعت ميته ابي انام العصر شوي، فحطيتهم عند المربية ودخلت انام.. بعد كم ساعة ماقدرت انام فطلعت من الغرفة وانصدم بالمشهد الكارثة😱😨😰!! المربية خلتهم ينامون العصر.. وهالشي يعني راح يسهرون بالليل.. وانا مانمت من امس الا كم ساعة !!
طبعا يومها صدق دخلنا ننام بنفس الوقت بس طبعا نمت انا قبلهم .. وصحيت بعد كم ساعة ولقيت الكل نايمين😅 فرحت سريري اكمل نومتي.
اذا هذي كانت نتيجة اول خطة فما بالكم بالامور الثانية🙆🏻.. طبيعي كلها كانت بنفس النظام.
التحدي الثاني كان الوجبات.. الصغير بسم الله عليه ماسبب اي مشكلة، لكن الكبير مشكلة متحركة بخصوص الاكل والنوم. طبيعي كشخص بالغوجباتي مجرد غداء وعشا بالبيت ويتخللها كم كوب شاي، والمفروض ولد اختي كطفل تكون وجباته اكثر مني. لكن الأخ قرر ما ياكل الا اذا اكلت معاه🤔، او لازم اجمع كل الافراد بالبيت ياكلون معاه او يضيع الوقت أبرر له ليه محد نزل ياكل معانا.
كمان كمشكلة للاكل كان يستسهل عليه يشرب حليب او عصير وتنسد نفسه على انه يجلس وياكل وجبه! عشان كذا كان لابد من معركة صغيرة عند كل وجبه، لان لو تركته لين يجوع راح يخرب موده ويصير يبكيعلى كل شي.
الصدمات هذي صارت بأول يومين .. عشان كذا قررت باقي الايام ماله داعي اسوي اي شي او حتى اخطط لاي شي .. ومشيت باقي الايام على روتين يعتبر اطلق روتين اذا عندك اطفال وانت ام عاملة:
  • صرت اذا ناموا انام على طول معاهم .. لا اشوف انمي ولا اقرا مانجا ولا حتى اجلس اهوجس.. ادخل السرير واغمض.
  • وقت الوجبة احاول مااشبع عشان الاخ كل ما جى ياكل اقدر اكل معاه ويتحمس.
  • اي مهمة خاصه بالعمل اخلصها بالدوام، ووقت ماارجع البيت ما اتواصل مع اي احد لا ايميلات ولا واتس اب.. لان يومي كله فعاليات مع الصغار. (هذي اهم نقطة لانها ريحتني كثييييير)
  • اسوي لهم روتين يومي يمشون عليه .. كنا العصر او المغرب ننزل الحوش نلعب بالسياكل تقريبا ساعة. الساعة تسع بالكثير كلهم لابسين بجاماتهم وبالغرفة. وقت النوم نطفي الانوار والتلفزيون وبس نترك الاباجورة .. نقرا قصه مرة او اثنين وبعدها عاد نقرر اما نغمض نريح عيوننا او نتفرج صور كيك في الانستقرام.. لا احد يسألني وش سالفة الكيك بس اكتشفت ولد اختي يحب يتفرج طبخ ورياضة😂.
  • لا للسكر 🙅🏻من العصر .. وقت ماكنت ادّرس ابتدائي كنت اعاني من الصغار بعد الفسحة، بس اذا الاطفال معك بالبيت الكارثة اكبر.. يحسسونك انك عجوز بالخمسين.

بعد ما سويت هالنظام باقي الايام كانت مريحه بشكل غريب💓 .. صدق ما قدرت ارجع لنظامي العادي وكان في تأخير ببعض الانجازات في المتجر والعمل، بس بالمقابل كنت على الاقل انام كويس ومو مرهقه طول اليوم. بدا يصير الاطفال جزء من يومي💓 وبدال مااشرب قهوتي على صوت العصافير واغاني يابانية في الخلفية؛ صار اغاني مثل Wheels on the Bus في الخلفية وصوت واحد من عيال اختي يسولف💓. صار اصلا طبيعي واحنا نتمشى بالبيت نغني اغاني الأطفال باعلى صوت😅. صار طبيعي مااقدر اتحرك بين الغرف بسرعه واترك الابواب وراي مفتوحة لان فيه طفلين يلحقوني واحد منهم مدمن على اللعب بالموية وتوه متعلم يطلع الدرج💓 والثاني يقعد يسأل وين بروح ووش بسوي وليه بروح💓.
الغريب هو التغيرات اللي صارت لي حتى في تفكيري. في يوم كنت حاضرة لقاء للتجار مسائي وجت الساعة ٩ وانا باقي بالطريق وكل اللي كنت افكر فيه ان يارب المربية دخلتهم الغرفة يستعدون ينامون😅.
وباليوم اللي رجعوا فيه بيتهم حسيت بفراغ غريب .. مو مصدقة انه عادي انام وقت ماابي ومااشيل هم السهر😅 ..
تجربة غريبه بس ممتعه💜 واظن عادي اكررها💜💓💜..
سويت هاشتاق في تويتر باسم #partTimeMom حطيت فيه بعضيومياتي معاهم سواء تحلطم او مواقف مضحكة. شاركوني مواقفكم سواء في الهاشتاق او في التعليقات💜